اوپری اثرات کا معاملہ
میں نے دیکھا کہ میرے چند جاننے والے اور ہم ایک آدمی کو پکڑتے ہیں اور اسے لٹا کر اس کی گردن تلوار سے کاٹ دیتے ہیں۔ میں دل میں سوچتی ہوں کہ انہوں نے میرے سامنے ایک آدمی کو ماردیا اور میں کچھ نہیں کرپائی۔ پھر دیکھا کہ غیبی گھوڑی ہے اس کی لگام میرے ہاتھ میں ہوتی ہے‘ اس کا رنگ سنہرا ہے اور وہ بے جان ہوتی ہے اور سونے کی بنی ہوتی ہے اس کی ایک طرف میان میں تلوار لٹکی ہوتی ہے وہ بھی گولڈن رنگ کی ہوتی ہے پھر میں نے دیکھا کہ وہ لوگ میری طرف آرہے ہیں تو میں کہتی ہوں کہ میں اب انہیں نہیں چھوڑوں گی میں نے وہ تلوار میان سے نکالی پھر میری آنکھ کھل گئی۔(ک،اوکاڑہ)
تعبیر:آپ کے خواب کے مطابق اس بات کا اشارہ ہے کہ آپ پر اوپری اثرات کا مسئلہ کافی عرصہ سے چل رہا ہے۔تاہم اس طرف اشارہ ہے کہ انشاء اللہ جلد ہی یہ اثرات دور ہوں گے۔ آپ آیت الکرسی 125مرتبہ روزانہ پڑھ کر دم کرلیا کریں ۔ یہ عمل 41دن کرلیں ان شاء اللہ مکمل صحت نصیب ہوگی۔ واللہ اعلم۔
پوتے کا فوری صدقہ دیں
میں نے خواب میں دیکھا کہ میرا پوتا پنجرے سے کبوتر نکال رہا ہے، اس کا رنگ گہرا مٹیالا یا کالا ہے۔ میں اس سے کہتا ہوں کہ نہ نکالو اسے بلی کھا جائے گی۔ پھر وہ کبوتر اس کے ہاتھ سے نکل جاتا ہے۔ پھر دیکھتا ہوں کہ وہی کبوتر الٹا لٹکا ہوا ہے اور اس کے ساتھ کبوتر کا بہت ہی چھوٹا سا بچہ بھی لٹکا ہوا ہے۔ اچانک بلی کہیں سے آجاتی ہے اور ان پر جھپٹ پڑتی ہے۔ پھر دیکھتا ہوں کہ دونوں کبوتروں کے سرتن سے جدا ہوتے ہیں۔(فیاض الحسن، جدہ)
تعبیر:آپ کے خواب کے مطابق اس بات کا اندیشہ ہے کہ آپ کا پوتا کسی شدید بیماری میں مبتلا ہو جائے تاہم فوری طور پر اس کا صدقہ کچھ گوشت ہاتھ لگوا کر بلی کو یا چیل کوئوں کو کھلادیں اور اس پر آیت الکرسی سات بار پڑھ کر پھونک دیا کریں۔ انشاء اللہ اس کی اور سب گھر والوں کی حفاظت رہے گی۔ واللہ اعلم
وظائف پڑھنے سے ترقی مل رہی
میںنے خواب میں دیکھا کہ میںمیدانِ بدر میں کھڑا ہوں، مسلمانوں اور کفار کے مابین جنگ ہورہی ہے (صرف جنگ دیکھی، نہ تو کسی صحابیؓ کو دیکھا اور نہ آپﷺ کو) پھر دیکھا کہ شیطان میرے پاس سے جنگ کے میدان سے بھاگتے ہوئے گزرتا ہے تو میں اس سے پوچھتا ہوں کہ کہاں جارہے ہو، تو وہ کہتا ہے کہ تمہیں نہیں پتا جو میں دیکھ رہا ہوں آسمان سے مدد اتر رہی ہے، فرشتے اتر رہے ہیں، اس کے بعد میری آنکھ کھل جاتی ہے۔(محمد نوید، اوکاڑہ)
تعبیر:آپ کے خواب کے مطابق اس بات کا اشارہ ہے کہ انشاء اللہ آپ کی غیبی مدد کی جائے گی اور آپ کے سارے معاملات بفضل خدا بہت جلد بہتر انداز میں طے پا جائیں گے، جو وظائف آپ پڑھ رہے ہیں ان کو پابندی سے پڑھتے رہیں اور مالی ترقی کے لیے سورئہ مزمل روزانہ11 مرتبہ اوّل و آخر درود شریف گیارہ گیارہ مرتبہ اور ایک بار سورئہ واقعہ رات میں تلاوت کرکے دعا کرلیا کریں۔ واللہ اعلم۔
یہ بندش جلد ختم ہو جائے گی
یہ خواب کافی عرصے سے دیکھ رہی ہوں کہ میرا پیپر ہے اور میں سینٹر پہنچ نہیں پاتی، راستے بہت تنگ و تاریک ہوتے ہیں اور اگر میں پہنچ بھی جائوں تو مجھے پیپر سمجھ میں نہیں آرہا ہوتا اور اس کے علاوہ میں یہ بھی دیکھتی ہوں کہ میرا جوتا ٹوٹ جاتا ہے یا گم ہو جاتا ہے اور مجھے میرا جوتا نہیں ملتا۔ دوسرے خواب میں مجھے کسی کی آواز سنائی دیتی ہے۔ کوئی مجھ سے کہہ رہا ہوتا ہے کہ تم سورۂ واقعہ پڑھا کرو تمہارے مسئلے حل ہو جائیں گے۔(ص،ح۔حیدر آباد)
تعبیر:آپ کے خواب کے مطابق آپ کے تمام اہم کاموں میں بندش کی وجہ سے رکاوٹیںہیں جس کی وجہ سے بنتے ہوئے کام بگڑ رہے ہیں۔ جیسا کہ خواب ہی میں بشارت دی گئی ہے کہ ان شاء اللہ یہ بندش جلد ختم ہو جائے گی۔ آپ بعد نماز مغرب ایک بار سورۂ واقعہ اور بعد نماز عشاء ایک بار سورۂ ملک ہمیشہ پڑھا کریں اور حسب استطاعت کچھ صدقہ بھی دیتی رہا کریں۔ ان شاء اللہ جلد ہی بندش ٹوٹ جائے گی۔ واللہ اعلم۔